1Th 3 | KZE | STEP | kentávékai ávááraumai imáyáama kwéekaimanivo maankákáí maékai keinárawaꞋa óꞋopaꞋa máyáantavekai Áténesi-naopaꞋa keiráí maékai

1 Thessalonians 3

1 kentávékai ávááraumai imáyáama kwéekaimanivo maankákáí maékai keinárawaꞋa óꞋopaꞋa máyáantavekai Áténesi-naopaꞋa keiráí maékai 2 Tímótimba aiꞋmarááwáyana kentópaꞋa kuráiye. Tímóti kentáásí kawe-kwáásí póna kwesé keséya Áánútuna mayáíyá kwémayaunanaya póna Ísu Káráísitina áséi-kwasai simátímaꞋmaena kwégwiye. kotirávayainaꞋa ÁánútunkaꞋa agevamái asiramái meígwáe séꞋa Tímótimba aiꞋmarááwánana kuráiye. 3 Áánútun-aai ímo ísááwai sáwíꞋa umátinkaiyaꞋa Áánútumba aúwáavo séꞋa Tímótimba aiꞋmarááwánana kuráiye. Áánútu séna kesááimo ímo ísááwai sáwíꞋa umátinkanaaowe siráimba pósa kentáá sáwíꞋa kwéumasinkaamba áꞋa ísaraawe. 4 keinárawate maéwándarata séta sáwíꞋa umásinkanaaowemo siráundaya ívéꞋa magwévaarisaꞋa kwéawanaawe. 5 kemá imáyáama éꞋa Sáátáánigo séna Áánútumba auwésa kesáái isáígwáe siráintaveꞋa mirá uráawe. ÁánútunkaꞋa agevamái máyáao séꞋa kentáái isánáe séꞋa Tímótimba aiꞋmarááwánana kentópaꞋa kuráiye. kentópaꞋa mayáímá komayááwánda áúgwaraꞋ-mayaima mairáunda ívéꞋa mimbáyáígón-áúma íma kwáívo séꞋa Tímótimba aiꞋmarááwánana kuráiye.

6 Tímóti kentópaꞋa koména koyauweréna kesópaꞋa téna keinárawatavena séna ÁánútumpaꞋa tirumbá kwétimesa kwenkáꞋá agevamái asiramái máyaawe séna áséi-kwasai tasimásímakaiye. keinárawaꞋo kentávéꞋo séꞋo kawer-áímbá kwésiyemo senkwáráꞋá tasimásímakaiye. kesáámó sétaamo keinárawaꞋa kotuwánanaemo súnaꞋo kentááyávéꞋo tatuwánanaemo senkwáráꞋá tasimásímakaiye. 7 Áánútun-aai kwésimatimundarakemba évakarawai sáwíta umásínkáankaꞋa Áánútun-aaiyavesa áraire sésa kwenkáꞋá agevamái asiramái máyáan-aimba tasimásímakaimba póna sirávayai-aimba tasimásímakaiye. 8 ÍsóigompaꞋa tarúmaimo asiramáímo máyáan-aimba iséta póta kawetá umái máyaumne. 9 ÁánútunkaꞋa asiramái máyáawata póta Áánútunopata kentáásirunko kaweꞋá kwéisata Áánútumpata súwi kwésune. 10 keinárawatopaꞋo kónaunda-amba Áánútu kwiꞋmaráníntaveta eénáínkaꞋa aaváyaaraꞋa Áánútumpata asiramái áísaa úmae kwéiyune. Áánútun-aaiyaveꞋa áraire séꞋa kwenkáꞋá agevamái máyáambanivo moórávaꞋa kwéyuwaantaveta kotúwaꞋnaa ónáe séta ÁánútumpaꞋa asiramáíya kwésune.

11 námúnaa kwésundaya pósarai Áánútu kentáásivoe Ísu kentáásí Ísóigoe umái kentópaꞋo kónaunda-amba kwisinkáyááoiye. 12 námúnaa kwésundaya póna kesiruntá ávááraumai tímakaundanten-umai Ísóigoma imáyáa timínaꞋa moórá-mora-umai ísámai kentirumbá kwétimeꞋa amápa-kwaasivimba kentirumbá kwétimeꞋa ménaaowe. 13 mirá íyana Áánútu kentirunkómbá asiramátinkainaꞋa Ísu kentáásí Ísóigomo kwená kwaásiyemo kumíndaraꞋa Áánútu kentáásivowa aúrankaꞋa kaweꞋá umái maíyana sáwí-aimba kempímbá íma kwénintaveta námúnaa kwésune.